Miguel Indurain

Miguel Maria Indurain (ok: Induráin) Larraya (* 16. Juli 1964 in Villava) is en ehmalger spaansch Radrennfohrer. He tellt mit fiev Siegen bi de Tour de France, twee Siegen bi den Giro d’Italia, je een Olympiasieg un een Weltmeesterschap in’t Eenzeltietfohren as ok een Stünnweltrekord to de spoodrieksten Radrennfohrers in de Historie vun den Radsport.

Indurains weer besünners stark in’t Eenzeltietfohren, allerdings weer he ok de Bargen good.

Rennkarriere |

Indurain sien Profikarriere fung 1985 an, nahdem he een Johr tovör ahn Spood an dat Straatenrennen bi de Olympisch Sömmerspelen deelnommen harr. Sien Team weer de spaansch Reynolds-Mannschap. 1985 nehm he to’n eersten Mal an de Tour de France deel. He weer dor aber man blots Mannschapsfohrer, de för sien Teamkapitän Pedro Delgado Helfperdeensten makt hett. As Delgado 1988 de Tour de France wunn, harr Indurain doran en grooten Andeel: An entscheedend Anstieg hett Indurain de Führensarbeit för Delgado leist un muss eegen Chancen up Deelstreckensiege utlaaten. Bi de Tour de France 1990 weer Indurain all düütlich beeter as Delgado, hull sück aber an de interne Rangordnung vun de Mannschap.

Af 1991 weer Indurain bi sien Team, dat nah en Sponsorenwessel nu Banesto heeten dee, alleenig Fohrer för dat Gesamtklassement. Indurain wunn van 1991 bit 1995 fievmal in Folg de Tour de France; he weer dormit de veerte Fohrer de dat schafft hett un de eerste, de dat ahn Ünnebreeken henkreegen harr. In de Johren 1992 un 1993 wunn he todem noch den Giro d’Italia. To disse Erfolge keemen noch mehrere Siege bi körtere Rundfohrten: tweemal Paris-Nizza, dreemal Katalonien-Rundfohrt un tweemal Dauphiné Libéré un eenmal hett he dat Weltcuprennen Clásica San Sebastián wunnen. Insgesamt hett Indurain 65 Siege as Radprofi up sien Naam schreven, dorünner 12 Deelstrecken bi de Tour de France un veer bi den Giro d'Italia.

Miguel Indurain bi dat Criterium Ciutat de L'Hospitalet

Bi de Straatenweltmeesterschap 1995 wurr Indurain Weltmeester in’t Eenzeltietfohren un weer Tweet in dat Straatenrennen achter sien Landsmann Abraham Olano. Bi de Olympisch Sömmerspelen 1996 in Atlanta wunn he - ebenfalls in’t Eenzeltietfohren - de Goldmedaille.

1996 hett Indurain sein Karriere in dat Öller vun blots 32 Johren afslooten. Tovör weer he bi den Versöök scheitert, de Tour de France en sösst Mal to winnen. Bi den Sieg vun den däänschen Profi Bjarne Riis keem Indurain blots up den elften Platz in dat Gesamtklassement, nahdem he sück bi en besünners kolt un natt Weer in de eerst Week en swoor Verkollen totrucken harr. Bi en langeren Bargdeelstreck, de ok nah dör sien Gebortsoort führen dee, hett he 8 Minüüt up den Sieger vun den Dag verloren. Nah sien Olympiasieg, de he in dat Natschonaltrikot rutfohren hett, is in‘ Harvst 1996 noch up Druck vun den Teamsponsor bi de Vuelta a España antreden, de he sowieso nich fohren much un de in sien Saisonplanung nich vörsehn weer. Indurain, de sück beklaagt hett, dat sück sien Been „as Holt“ anföhlen dee, un över Atemnot klaagt hett, hett de Rundfohrt afbraken un sien Karriere beend.

Sien wichtigsten Siege |

Stünnweltrekord |

1994 hett Indurain mit 53,040 Kilometern en nee Stünnweltrekord upstellt, de aber as all tüschen 1984 un 1996 upstellt Stünnweltrekorde vun de UCI annulleert wurr.

Ehrungen |

1992 kreeg Miguel Indurain den Prinz-von-Asturien-Pries un wurr nah sien fievte Sieg bi de Tour de France in Lausanne mit den Olympischen Oorden uttekent. Er is Liddmaat in dat spaansch Olympisch Komitee un in‘ UCI-Utschuss für Profiradsport. Dorto is he Ehrenvörsitter vun sien eegen Miguel-Induráin-Stiften.

Grünnen vun sien Spood |

De Grund för Indurain sien tietwies völlig Överleegenheit leeg in de Kombitnatschoon vun mental Stärke un butergewöhnlich körperlich Werten. Sien Grött vun 1,88 m un sien Gewicht vun ungefähr 80 kg hebbt hüm den Ökelnaam Big Mig inbrocht, hebbt aber to good Hebelverhältnissen un Kraftwerten führt. Indurain sien Lungenkapazität bedroog acht Liter un dormit dree Luter mehr as de minschlich Dörsnitt. Den Rekord för den leegsten Ruhepuls, de je bi en gesund Minsch meeten wurr, hollt Indurain mit 28 Hartslääg pro Minüüt ^[1]. De dörsnittliche Wert vun Utwussen liggt bi etwa 70 Hartslääg pro Minüüt. Todem bedroog sien Hartminüütvolumen 50 l/min. Upgrund vun disse Werte weer sien Körper in de Laag, mehr Suerstoff uptonemmen un an de Muskels wiedertoleiten as sien Gegners.

Utteknungen |

• 
  Vélo d’Or 1992, 1993

Weblenken |

• DNB-Katalog


• Palmarès


• Homepage von Miguel Indurain (spaansch)


• Fundacion Miguel Induráin


• Miguel Indurain in de Datenbank vun de Tour de France (engelsch)


• Miguel Indurain in de Datenbank vun Radsportseiten.net

Enkeld Nahwiesen |

1. 
   ↑ Körperrekorde